Trampın müharibə üçün 200 milyard dollar tələbi Konqresdə tənqidlə qarşılandı

Prezident Donald Tramp 20 ildir ki, çıxışlarında İraq müharibəsini fəlakətli səhv adlandırır. O, hələ prezidentliyə namizəd olanda Yaxın Şərqdəki sonsuz müharibələrə son qoyacağına söz verirdi. Lakin Tramp İran əməliyyatı üçün Buşun İraq müharibəsi zamanı istədiyi vəsaitdən daha çox pul tələb edir.

Qerbxeber.com xəbər verir ki, bu barədə “Newsweek” jurnalındakı məqalədə qeyd olunur.

“Epik Qəzəb” əməliyyatının növbəti mərhələsini maliyyələşdirmək üçün Pentaqon 200 milyard dollar istəyir. Bu, Buşun 19 mart 2003-cü ildə İraqa qarşı hərbi müdaxiləsi zamanı Konqresdən istədiyi məbləğdən təxminən 67 milyard dollar çoxdur.

İnflyasiya nəzərə alınmaqla, Buşun 74,7 milyard dollarlıq tələbi bu gün təxminən 133 milyard dollara bərabər olacaq. Trampın İran üçün tələbi artıq bu məbləği üstələyir.

Cəmi bir neçə həftəlik hava əməliyyatları və sursat təchizatını əhatə edən 200 milyard dollar artıq Buşun İraqa müdaxilənin ən qızğın dövründə, orada 170.000 əsgərin yerləşdiyi dövrdəki illik xərclərini üstələyir.

Yəni Tramp daha məhdud bir əməliyyat üçün daha çox pul istəyir.