Marneulidə yeniyetmə satıcıya fiziki zorakılıq edən Mamuka Qiqani saxlanılıb
Gürcüstan Daxili İşlər Nazirliyinin (DİN) Kvemo Kartli Polis Departamentinin Marneuli Rayon Şöbəsinin əməkdaşları həyata keçirilən əməliyyat-axtarış tədbirləri və istintaq hərəkətləri nəticəsində, 1998-ci il təvəllüdlü Mamuka Qiqaninı azyaşlıya qarşı zorakılıq ittihamı ilə saxlayıblar.
Qerbxeber.com xəbər verir ki, bu barədə Gürcüstan DİN məlumat verib.
Bildirilib ki, cinayət əməli 2 ilədək azadlıqdan məhrumetməni nəzərdə tutur.
“İstintaq müəyyən edib ki, təqsirləndirilən şəxs Marneulidə yerləşən şirniyyat mağazalarından birində mübahisə zəminində mağazanın Azərbaycan türkcəsində danışan əməkdaşına fiziki zorakılıq göstərib və hadisə yerindən qaçıb. Hüquq-mühafizə orqanları M.Q.-nı baş verən hadisədən az sonra təqsirləndirilən şəxs qismində saxlayıblar.
İstintaq azyaşlıya qarşı zorakılıq faktı üzrə Gürcüstan CM-in 126-cı prim maddəsinin birinci hissəsinin “a” bəndi ilə aparılır” , – məlumatda deyilir.
Qeyd edək ki, yayılan məlumatlara görə, Marneuli Bələdiyyə Məclisi sədrinin müavini Riçard Qiqaninin oğlu Mamuka Qiqani “Melody” şirniyyat evində satıcıdan gürcü dilində danışmağı tələb edib. Lakin sarıcı gürcü dilini bilmədiyinə görə Mamuka Qiqani ona şillə vurub. Bu zaman ətrafdakılarla onun arasında qarşıdurma yaşanıb. Hadisələrə Marneuli Bələdiyyə Məclisi əməkdaşı Tornike Mtvarelidze daxil olub.
