“Barselona” və “Real Madrid” bu gün üz-üzə gələcəklər
Bu gün futbol üzrə İspaniya La Liqasında 35-ci turun mərkəzi oyunu keçiriləcək.
Qerbxeber.com xəbər verir ki, əzəli rəqiblər – “Barselona” və “Real Madrid” prinsipial görüşdə üz-üzə gələcəklər. Olimpiya Stadionunda təşkil olunacaq qarşılaşma Bakı vaxtı ilə saat 18:15-də başlayacaq.
Hazırda Kataloniya təmsilçisi 79 xalla turnir cədvəlinə başçılıq edir. “Kral klubu” isə 75 xalla 2-ci pillədə qərarlaşıb. “Barselona” bu görüşdə qalib gəlsə, xal fərqi 7-yə yüksələcək. “Real Madrid”in qələbəsi isə fərqi minimuma endirəcək. Bu mənada, oyunun nəticəsi sona 4 tur qalmış böyük ölçüdə çempionluğun taleyini həll edəcək.
“El-Klasiko” öncəsi hər iki komandanın heyətində itkilər var. Meydan sahiblərində Mark Bernal, Jül Kunde və Pablo Torye, qonaqlarda isə David Alaba, Eduard Kamavinqa, Dani Karvahal, Eder Militau və Ferlan Mendi zədə səbəbindən oyunda iştirak etməyəcəklər. Madrid klubunun müdafiəçisi Antonio Rüdiger isə cəzalı olduğu üçün matçı buraxacaq.
