İTV-də seçki təşviqatı qiymətləri

Yanvarın 17-də parlament seçkisinin təşviqat mərhələsi başlayır. Fevralın 9-da keçiriləcək seçkinin ödənişli təşviqatına teleradio qurumlarından yalnız İctimai Televiziya və Radio Yayımları Şirkəti qoşulub.

Novator.az İctimai Televiziyanın seçki təşviqatı qiymətlərinə nəzər salıb.

Həftənin I-V günləri 6 dəqiqəlik çıxışın saniyəsi saat 09:54 üçün 22 manatdır.

Saat 12:44 və 13:50 üçün hər saniyəyə 26 manat qiymət qoyulub.

Saat 16:54 üçün saniyədə 32 manat ödəmək lazım gəlir.

I-VI günlər arası namizədin saat 21:55 üçün 5 dəqiqəlik çıxışının saniyəsi 65 manatdır.

Saat 22:55 üçün hər saniyə 60 manat müəyyən edilib.

Hesablama aparanda görünür ki, İctimai Televiziyanın efirində namizədin 6 dəqiqəlik çıxışı üçün ən aşağı qiymət 7920 manat; maksimal qiymət isə 5 dəqiqə üçün 19500 manatdır.

Parlament seçkisi 125 dairə üzrə keçiriləcək. Seçki Məcəlləsinə görə, dairələrin 60-dan çoxunda namizədləri qeydə alınmış siyasi partiyalara, siyasi partiyaların bloklarına ödənişsiz efir vaxtı və dərc üçün yer ayrılmalıdır. Ödənişsiz efir vaxtı İctimai Teleradioda, dərc üçün yer “Azərbaycan”, “Xalq qəzeti” və “Bakinski raboçi” qəzetlərində nəzərdə tutulur.