“Qatillərin beyinlərinin morfologiyası fərqlidir!”-Professor Yusif Osmanovun yazısı

Maniakal intensiyalara rəvac verən mərkəzlərindən biri də limbik sistemdir, ələlxüsus, beyin badamcıqları və ya amiqdal cisim deyilən formasiyada gedən dəyişiklklər çox ciddi psixopatik davranışlara yol açır. Amiqdal cisimdə emosiyanın və davranışın mərkəzləri lokallaşdığından onun ciddi aberrasiyaları zamanı insan idarəolunmaz vəhşi məxluqa çevrilir. Emosiya və davranış mərkəzlərinin zədələnməsi adətən, şiş mənşəli olur.

Yalnız neyroanatomiyada gedən dəyişiklər qeyri-adekvat, vəhşi xislətli reflekslərə səbəb olmur. Bir neçə seriyalı qatildə bunun şəxsən şahidi olmuşam. Hətta mikroskopik səviyyədə sezilə bilməyən çatışmazlıq zamanı beyin tikələrinin molekulyar tədqiqatı maraqlı nəticələr vermişdi. Neyronların FISH-analizi onlarda MAOA və CDH13 mutant allellərini aşkarlamışdı. MAOA və CDH13 allellərinə “döyüşçü genləri” də deyirlər. MAOA- gen normada məmnunluq hissi gətirən dopaminin sintezinə cavabdehdir.

MAOA-genin mutasiyasına məruz qalmış şəxslərdə, spirtli içkidən və ya narkotik vasitədən istifadə zamanı, dopaminin miqdarı o hədlərə çatır ki, insan hiperaqressiv subyektə dönür. Mutasion CDH13 geninin ekspressiyası da insan psixikasında sosiuma qarşı etinasızlıq və nifrət hissləri yaradaraq subyekti potensial qatilə çevirir.