Qazax xəngəli və İtalyan pappardellesi-İbrahim Nəbioğlundan

PAPPARDELLE – TOSKANA XƏNGƏLİ

Mən bir dəfə pappardelle yemişdim.
Elə bil Qazax xəngəli idi.

Mən italyanların Appenin yarımadasına babalarımın yaşadığı torpaqlardan köçdüyünü iddia etmirəm. Amma…

Axı tarixdə xalqlar yeni kəşflər, yeni yaşayış məntəqələri üçün hər zaman Şərqdən Qərbə hərəkət ediblər.
Belədir axı…
Vaxtım olsa ortaya bir iddia atardım, amma qalsın sonraya.
Qayıdaq italyanların xəngəlinə…

Pappardelle İtaliyanın Toskana bölgəsinə xas makarondur.
Bu makaron növü digərlərinə görə

yastı (bizim xəngəl kimi);
geniş (bizim xəngəl kimi);
böyükdür (bizim xəngəl kimi).

Ancaq Pappardelle Qazax xəngəlindən fərqli olaraq kvadrat və ya romb şəklində, yəni “yayma yarpaq” kimi kəsilmir, açılandan sonra xəmiri (biz tərəfdə “xamır” deyirlər) uzunlamasına kəsirlər.
Bəzən onları fəsəli kimi yuvarlayıb qurudurlar…daha uzun müddət saxlamaq mümkün olsun deyə.

Pappardelle italyanca “pappare” sözündən gəlir.
Pappare isə nə deməkdir, bilirsizmi – “acgözlüklə yemək”.

Bunu bir dəfə dostlarımdan birinə dedim.
Zəngin Toskana mətbəxinin bilicisi kimi ciddi görkəm alıb belə dedi:

– Ağrın alım, tərcümən qüsurludur. O pappare “basıf yemək” deməkdir…

Və bu adamın az sonra bir sini Qazax xəngəlini “aşırmasından” və ikinci sinini istəməsindən sonra tərcüməsinin doğru olduğuna, hətta italyanca bildiyinə də inandım…

İbarhim Nəbioğlu