Professor Yusif Osmanov:Azadlıq yolu məşəqqətli olsada zirvəyə aparır

Ürəkləri dəqiqədə 600 dəfə vuran siçanlar, bədən hərarətini stabil saxlamaq naminə, çox hərəkətli olurlar. Bu səbəbdən, intensiv enerji sərfini kompensasiya etmək üçün, mütəmadi qida qəbuluna məcburdular. Daima stres vəziyyətində yaşayan siçanlar təbiət etibarı ilə çox ehtiyatlı canlılardır. Potensial düşmənlərinin feromonlarını, instiktiv olaraq, selektiv duyma qabilliyətinə malik bu gəmiricilər yırtıcılar üçün çətin şikar sayılırlar. Amma bir yerə qədər… İlk baxışdan asan qida mənbəyi ilə qarşılaşan siçanlarda, ani olaraq, özünüqoruma refleksleri kəskin zəiflədiyindən azadlıqlarını, hətta canlarını belə, yemə görə qurban verə bilirlər. Fotoda nümayış olunan trivial eksperiment bunun bariz nümunəsidir. Qabla dolu qidanı xımır-xımır yeyən hürkək gəmirici, təhlükəni unudaraq, müəyyən zaman kəsiyindən sonra qabın dibinə çatır. Qida da bitir, azadlıq da. Öz tamahının badına gedən bu canlının taleyi artıq ona məxsus deyil.

İnsanlar arasında belə gəmiricilər məgər azmıdır? Hamının seçimi olur, hamının! Ya maneələrlə dolu çətin, lakin ləyaqətli bir yol, ya da qorxaqlıq, iradəsizlik və tamah ucbatından rahat görünən şərəfsizlik yolu. Üzdən şirnikləndirici gələn sərəfsiz yolun sonu yoxdur. Bir neçə addımdan sonra bir-birindən ağır tələlərə düşməyə məhkumsan və kimlərəsə ömürlük məhbussan; müvəqqəti toxluğa görə hürriyyətindən könüllü imtina etmiş, boz siçan zehniyyətlı köləsən. Azadlığı qazanmaq çətindir, itirmək asan. Yolu məşəqqətli olsa da zirvəyə aparır. İnsanlıq zirvəsinə.