Laçından şikayətlər artır: nə baş verir?

Laçın şəhərində tikilən evlər, orda iş şəraiti, əcnəbilərə verilən külli miqdarda maaş və s. ilə bağlı şikayətlər getdikcə artmaqdadır.

Laçın – bu xalqın 30 illik həsrətidir, Zəfərimizin ünvanıdır, Ordumuzun qüdrəti, qürurumuzu özümüzə qaytaran məkandır. İşğaldan azad edilən ərazilərdə əhalinin məskunlaşması, bu onillərlə dağıdılan, yerlə-yeksan edilən torpaqlara insan nəfəsinin qayıtması dövlətin əsas prioritetidir. Azərbaycanın az qala bütün iqtisadi potensialı bu ərazilərin qurulmasına, abadlaşmasına səfərbər olunub və heç də adi qaydada yox.

Prezident İlham Əliyev kəndlərin, qəsəbələrin, şəhərlərin özülünü qoyur, hər bir kəndin, qəsəbənin, şəhərin geniş küçələr, ekzotik evlərlə qurulmasına çalışır, ekoloji təmiz region yaratmağa köklənib. İlham Əliyevin Qarabağa vaxtaşırı səfərlərini, ordakı çıxışlarını izləmək kifayətdir ki, onun 17 min kv.km ərazini ecazkar bir məkana çevirmək, burada cənnət yaratmaq istədiyini müşahidə edəsən.

Laçının, Şuşanın bərpasından yayılan fotolar, evlərin, mənzillərin bərpasını əks etdirən görüntülər də bunu təsdiqləyir. Ədalətli danışsaq, bu təbiət gözəlliyi ilə həmahəng bərpa güvənc və fəxarət yerimizdir və ədalət naminə o gözəllikləri əks etdirən fotoları da təqdim edəcəyik.

İşğaldan azad edilən Qarabağ sözün hər mənasında cənnətməkana çevrilir. Məhz bu ərazidə heç bir tənqid, heç bir üzücü informasiya ola bilməz, olmamalıdır və buna imkan verilməməlidir!

Günlərdir tənqidlər başlayıb: evlərin keyfiyyətsizliyi iddia edilir, yeni təmirdən çıxan mənzillərin divarlarının suvaqlarının əl vuran kimi uçduğu bildirilir – mütləq şəkildə rəsmi açıqlama olması, o iddianı səsləndirənlərlə birgə ictimai səfər, iddia edilən faktın yerindəcə araşdırılması vacibdir.

Bu əraziyə Prezident hər il milyardlarla vəsait ayırır, milyardlarla: burda bəzi evlərin bərpası üçün xaricdən mütəxəssis gətirilir və aylarla bəzən bir aynabəndin şəbəkəsi işlənir. Bütün bunlar Qarabağın təbii ecazkarlığının evlər, binalar, yollar, küçələr, bağlar-bağçalarla… vizual tamamlanması üçün edilən fədakarlığın bir ayrı adıdır.

Heç kəsə imkan vermək olmaz ki, Qarabağa ayrılan milyardların təyinatdan kənar xərcləndiyi və yaxud hansısa yeyinti olduğu haqda təsəvvür yaratsın. O torpaqlara axan şəhid və qazi qanları hələ qurumayıb; o torpaqların həsrəti ilə qovrulanların böyük əksəri hələ oraları ziyarət edə bilməyib. Onların – elə hamımızın təsəvvüründə tamamilə fərqli statusda olan yurd yerlərimiz haqda bu nə iddialardır?

İddia və ittiham ünvanı – yeri gəlmişkən, niyə “Bakı Abadlıq” şirkətinin adı hallanır? – cavab verməyə, bu təsəvvürlərin yayılmasının qarşısını almağa niyə tələsmir?