Xalqın sevgisi ilə,Haqqın hüzüruna gedən Adam

23 il keçməsinə baxmayaraq,elə bil dünən idi.Hər şey olduğu kimi xatirəmdədir.Mətbuatdan,bir gün əvvəl müəyyən həyacanlı xəbərlər yayıldı.Avqustun 21-də,günorta saatlarında Heydər Əliyev Aztv-də canlı yayıma çıxıb,-AXCP sədri,keçmiş prezident Əbülfəz Elçibəyin Gülhanə Tibb Akademisində vəfat etdiyini,partiya üzvlərinə və sevənlərinə baş sağlığını verdiyini dedi…
Anam həyətdə çörək bişirirdi,sacda.Ağlaya-ağlaya mən Bakıya gedirəm dedim.Bəy rəhmətə getdi dedim.
Avtovağzalda 2 mərtəbəli avtobus var idi,qonşu Gürcüstandan gələn,ona mindim.Yolda söhbət Bəydən düşdü,şoferlərlə birgə ağladığım heç vaxt yadımdan çıxmaz.Bakıda Ülvi bəylə görüşdüm,sakit səssiz qucaqlaşıb ağlaşdıq.
Ayın 22-i Bəyin evinə yığışmışdı insan seli,bir hissə akademiyanın qarşısına,böyük bir izdiham isə,Xəqani 33-ə toplaşmışdı.Günorta saatlarına yaxın,Şeyx, Murtuz Ələsgərov, Hacıbala Abutalıbov,Ramiz Mehdiyev gəldi.Sonra dəfn başladı,izdiham cənazə maşınını qəbul etmədi.”Varovskidən”,Akademiya bağına qədər,əl üstündə daşındı Əbülfəz Elçibəy.Yol kənarında səyyar satıcılar,mağaza və market sahibləri,küçəyə masa qoyub üstünə sərin su qoyub,pulsuz paylamaqlarını o izdihamda olan hər kəs xatırlayar.Hələ yüksək mərtəbəli binalardan cənazənin üstünə qərənfil səpən insanları heç unutmaram.”Elçibəy ölməz,Vətən bölünməz”,”Ən böyük Elçibəy,başqa böyük yox”şüarlarını səsləndirirdi böyük bir izdiham,insan seli!!Böyük məhəbbətin,böyük sevginin vida mərasimi idi o gün!Bəlkə də, çoxlarının,çoxumuzun qibtə etdiyi bir cənazə idi o cənazə,o tabut.Amma və lakin,o sevginin tək adı var idi,Bəy sevgisi.Xalq onu,Ondan çox sevənə öz sevgisini izhar edirdi.Sağlığında qiymətini bilmədiyi,qoruya bilmədiyi Liderinə göz yaşı tökürdü,vəfa borcu idi sanki bu.
Bəy isə Haqqa doğru yürüyürdü.Sağlığında gəncliyə xitabən bir söz demişdi:”Xalqı sevən-Haqqı sevər!Xalqın sevdiyini-Haq da sevər!
Siz xalqın sevdisi ilə Haqqa çatacaqsınız”
Xalqın sevgisi ilə Xaliqin hüzuruna gedirdi,Xalqın Elçisi.
22 .08.2023.
Məhərrəm Göyüşoğlu
“Qərb xəbər”