“Rusiya Vardanyan vasitəsilə Qarabağa PUA-lar göndərib” – Politoloq

“Qarabağdakı erməni separatçıları Ermənistan və Azərbaycan arasında Qərbin vasitəçiliyi ilə keçirilən danışıqlar prosesini pozmaq üçün silahlı təxribatlar həyata keçirir. Yerevan da öz qeyri-konstruktiv mövqeyindən geri çəkilmir. Separatçılar və qanunsuz silahlı erməni birləşmələri uzun müddət idi ki, mühəndis-istehkam işləri aparırdı. Həmçinin kənd təsərrüfatı işləri adı altında müəyyən kəşfiyyat fəaliyyəti həyata keçirirlər. Azərbaycan isə təbii ki, bunun qarşısını alır və almaqda davam edəcək”.

“Qərb Xəbər” bildirir ki, bunu Bakupost.az -a açıqlamasında politoloq Məhəmməd Əsədullazadə deyib.
O bildirib ki,​ Rusiya tərəfindən Vardanyan vasitəsilə Qarabağa PUA-lar göndərilib. Bunlar əsasən, Çin və İran istehsalıdır. Bütün bunlar silahlı erməni birləşmələrinin təxribatlarının davam edəcəyini deməyə əsas verir:
“Bu təxribatlara son qoymaq üçün Azərbaycan antiterror əməliyyatlarına başlamalıdır. Rəsmi Bakı antiterror əməliyyatı keçirərək separatçı-terrorçuları məhv etməlidir”.
Politoloqun dediyinə görə, mövcud proseslər Rusiya tərəfindən idarə olunur. Kreml Qərb vasitəsilə sülh müqaviləsinin imzalanmamasına çalışır:
“Təbii ki, separatçılar Moskvanın dəstəyi ilə idarə olunur. Hazırda Rusiya hakimiyyəti öz nüfuzunu itirir. Belə bir məqamda Azərbaycan əməli addımlar ataraq Qarabağdakı separatçıların fəaliyyətinə son qoymalıdır. Bir müddətdən sonra isə Rusiya sülhməramlılarının Qarabağdan çıxarılması tələb olunmalıdır”.