Gədəbəydə polislə yerli əhali toqquşdu: DİN açıqlama yaydı – Video

Sosial şəbəkələrdə bir qrup vətəndaşla polisin qarşıdurmasını əks etdirən video yayılıb.

Yayılan bu videonun Gədəbəy rayonunun Söyüdlü kəndində çəkildiyi məlum olub. Məlumata görə, qarşıdurmanın səbəbi kənd ərazisində qızıl mədənlərinin işlənməsi ilə bağlı olub, yerli sakinlər buna etiraz ediblər.

Qeyd edək ki, bu görüntülər sosial şəbəkələrdə ciddi etiraz doğurub. Bir çox tanınmış şəxslər, hüquq müdafiəçiləri, siyasətçilər, jurnalistlər, blogerlər, ictimai-siyasi fəal insanlar baş verənlərlə bağlı öz etirazlarını bildirib, günahkarların tezliklə cəzalandırılmasını tələb ediblər.

Hadisə ilə bağlı Daxili İşlər Nazirliyi açıqlama yayıb.

Açıqlamada bildirilir ki, bu gün günorta saatlarında Gədəbəy rayonu Söyüdlü kəndində bir qrup şəxs kənd ərazisində inşa olunan süni gölün tikintisinə qanunsuz müdaxilə edib:

“Həmin şəxslərə dəfələrlə xəbərdarlıq edilməsinə, izahedici söhbətlər aparılmasına baxmayaraq, onlar qeyd olunan əraziyə toplaşıblar.

Onlar polisin qanuni tələblərinə qəsdən tabe olmayaraq daşla, küt alətlərlə bir neçə fəhləyə xəsarət yetirib və polis əməkdaşlarına qarşı müqavimət göstərməyə cəhd ediblər. Görülmüş tədbirlərlə qanunsuz aksiyanın iştirakçıları ərazidən uzaqlaşdırılıblar.

O ki qaldı videogörüntülərdə polis əməkdaşının qadınlardan birinə gözyaşardıcı qaz tətbiq etməsi ilə əlaqədar DİN-in bir qrup əməkdaşı Gədəbəy rayonuna ezam olunub. Həmin fakt üzrə xidməti yoxlama aparılır.

Xidməti yoxlamanın nəticəsindən asılı olaraq məsələyə hüquqi qiymət veriləcəkdir”.