Medal qazanan güləşçilər mükafatlandırılıb

Azərbaycan Güləş Federasiyasının (AGF) prezidenti əvəzi Namiq Əliyev İspaniyanın Pontevedra şəhərindəlki gənclər arasında Avropa çempionatında medal qazanan güləşçilərlə görüşüb.

Federasiyanın saytının məlumatına görə, medal qazanan güləşçilərə pul mükafatları verilib. AGF rəhbəri bildirib ki, bir müddət federasiyada problemlər yaşansa da, yenidən toparlanaraq ayağa qalxıblar.

O, deyib ki, federasiya hər zaman əlindən gələni edir: “Sözsüz ki, prezident İlham Əliyevin dəstəyinin böyük rolu var. Bunun da nəticəsində iş gedir. Federasiya yumruq kimi birlik nümayiş etdirməlidir. Güləşçilər də onlara yaradılan şərait müqabilində bacarıqlarını göstərməli, üzərlərində maksimum dərəcədə işləməlidirlər. İnsan çalışmaqla hər şeyə nail ola bilər. Yığmada heç kimin yeri təmin olunmayıb. Heç kim zəmanət verə bilməz ki, burada əyləşən gənclərdən kimsə gələn il Tokio Olimpiadasında iştirak etməyəcək. Toğrul Əsgərov Olimpiya Oyunlarına yollananda cəmi 19 yaşı vardı. Səhvlərinizi təhlil edib, onları aradan qaldırmalısınız. Estoniyanın paytaxtı Tallində keçiriləcək gənclərin dünya çempionatına 1,5 ay qalıb. Mundiala daha yaxşı hazırlaşmaq lazımdır. Ümid edirəm ki, Avropa çempionatında gümüş və bürünc medal qazananlar dünya çempionatında daha yaxşı nəticələrə imza atacaq. Hamınıza uğurlar arzulayıram”.

Xatırladaq ki, gənclərin Avropa çempionatında sərbəst güləşçilərdən Turan Bayramov (65 kq) ilə Abubakr Abakarov (79 kq) qızıl, Asxab Həmzətov (92 kq) gümüş və İslam Abuyev (125 kq) bürünc medal qazanıb. Yunan-Roma güləşçilərindən Əsgər Əlizadə (60 kq) gümüş, Zaur Əliyev (55 kq) isə bürünc medala sahib olub.