Ukrayna MN: Rusiya qüvvələri Luqansk bölgəsində bir neçə kilometr geri çəkildi

Ukrayna Müdafiə Nazirliyi Rusiya qüvvələrinin Luqansk bölgəsində bir neçə kilometr geri çəkildiyini, Çerniqov bölgəsində isə Qremyaç kəndinin azad edildiyini açıqlayıb.

Nazirlikdən verilən açıqlamada “Əsgərlərimiz Luqanskda uğurlu əks-hücum keçirib və düşmən qüvvələri bir neçə kilometr geri çəkilib. Çerniqov bölgəsində Qremyaç kəndi rus işğalçılarından azad edilib” deyilib.

Bəyanatda həmçinin bildirilir ki, Ukrayna xüsusi təyinatlıları Rusiya qüvvələrinin bir neçə istifadəyə yararlı hava hücumundan müdafiə sistemini ələ keçirib.

Bu arada, Ukrayna Baş nazirinin müavini İrina Vereşçuk bildirib ki, dünən 4676 mülki vətəndaş humanitar yardım dəhlizləri vasitəsilə təhlükəsiz bölgələrə təxliyə edilib.

Rusiya qüvvələrinin blokadası altında olan Mariupol və Berdyanskdan olan 3256 mülki vətəndaşın avtobus və şəxsi avtomobilləri ilə Zaporojiyaya keçdiyini qeyd edən Vereşçuk Luqansk vilayətinin müxtəlif şəhərlərindən 1420 nəfərin təhlükəsiz bölgələrə çatdığını bildirib.

Digər tərəfdən, Ümumdünya Səhiyyə Təşkilatı (ÜST) Rusiyanın hücumlarının davam etdiyi Ukraynada sağlamlıq mərkəzlərinə edilən hücumların sayının 100-ü keçdiyini açıqlayıb.

Təşkilatdan edilən yazılı açıqlamada müharibənin başladığı 24 fevral tarixindən bu yana sağlamlıq mərkəzlərinə 103 hücumun təşkil edildiyi və bunlardan 89-nun sağlamlıq binalarına, 13-nün təcili yardım və tibbi daşıma vasitələrinə təsir etdiyi bildirilib. / TRT

qerbxeber.com