Şəmkirdə “SHORECA-Orqanik və Ekodostu Kənd Təsərrüfatı layihəsinin icrası davam edir

Şəmkirin Zəyəm qəsəbəsi və ətraf kəndlərində “SHORECA” – Şəmkir Orqanik və Ekodostu Kənd Təsərrüfatı layihəsinin icrası uğurla davam edir.

Bu barədə Qerbxeber.com-a məlumat verən Layihə rəhbəri Ülviyyə Cəlilova bildirib ki, ABŞ-ın Azərbaycandakı Səfirliyinin dəstəyi ilə həyata leçirilən layihə 24 avqust 2024-cü ildən icra olunmağa başlayıb.

Layihənin əsas məqsədi yerli icmaların ekoloji təmiz, dayanıqlı və iqtisadi cəhətdən səmərəli kənd təsərrüfatı fəaliyyəti ilə məşğul olmasını dəstəkləmək, onların bazara çıxış imkanlarını genişləndirmək və ekodostu məhsulların istehsalına dəstək olmaqdır. Layihə, kənd təsərrüfatının yalnız iqtisadi deyil, həm də sosial və ekoloji tərəflərini diqqət mərkəzinə alaraq, yerli əhalinin bilik və bacarıqlarını artırmağa çalışır.

İqlim dəyişikliyi, ərzaq təhlükəsizliyi və ekoloji tarazlıq çağırışlarının getdikcə aktuallaşdığı bir dövrdə, dayanıqlı kənd təsərrüfatı və ekoloji məsuliyyətli istehsal modellərinin təşviqi zəruri hal alıb. Bu kontekstdə həyata keçirilən SHORECA layihəsi Şəmkir rayonunun Zəyəm qəsəbəsi və ətraf kəndlərində icma əsaslı orqanik və ekodostu kənd təsərrüfatı təşəbbüslərinin inkişafına töhfə verməkdədir.

Layihə çərçivəsində bu günədək bir sıra maarifləndirici və praktiki fəaliyyətlər həyata keçirilib. O cümlədən:

• Orqanik və ekodostu kənd təsərrüfatı üzrə seminar və təlimlər keçirilib. Bu təlimlərdə yer iştirak edən yerli istehsalçılar təbii gübrələrin istifadəsi, pestisidsiz əkinçilik, torpaq münbitliyinin qorunması və digər mühüm mövzularda biliklər əldə ediblər.
• Yerli istehsalçıların bir araya gəldiyi işgüzar görüşlər keçirilib. Bu görüşlərdə təcrübə mübadiləsi aparılıb, tərəfdaşlıqlar qurulub. İstehsal olunan məhsulların tanıdılması və satışının təşviqi məqsədilə yarmarkalar təşkil edilib, bu yolla həm yerli icmaların, həm də şəhər sakinlərinin ekoloji təmiz məhsullara çıxışı təmin olunub.
• Bu fəaliyyətlər nəticəsində artıq bir neçə yerli təsərrüfat dayanıqlı istehsal prinsiplərinə uyğun fəaliyyətə keçib, məhsullarını yerli bazarlarda tanıtmağa və satmağa başlayıb. Eyni zamanda, qadın və gənclərin layihəyə fəal şəkildə qoşulması, onların iqtisadi və sosial güclənməsinə də töhfə verib.

SHORECA layihəsi davam etdikcə, onun əhatə dairəsinin genişlənməsi və daha çox kəndlinin bu təşəbbüsdən faydalanması planlaşdırılır. Eyni zamanda, layihənin nəticələrinin uzunmüddətli təsirini təmin etmək üçün yerli icmalar arasında şəbəkələşmənin və təcrübə paylaşımının təşviqi davam etdiriləcək.

Layihənin icrasında göstərilən bu dəstək yerli icmaların dayanıqlı inkişafı istiqamətində mühüm bir töhfədir.