ABŞ İrana qarşı yeni sanksiyalar tətbiq edir

ABŞ İranın hərbi proqramlarını dəstəklədiyi üçün digər ölkələrdən olan şəxslərə və təşkilatlara qarşı sanksiyalar tətbiq edir.

Qerbxeber.com xəbər verir ki, bu barədə Oxu.az “Azad İran”-nın məlumatına əsasən xəbər yayıb.

Məlumata görə, ABŞ Maliyyə Nazirliyinin Xarici Aktivlərə Nəzarət Ofisi (OFAC) İran, Çin, Almaniya, Portuqaliya və Uruqvaydan olan 30-dan çox fiziki və hüquqi şəxsi müəyyən edib. Onların hamısı kütləvi qırğın silahlarının yayılması ilə bağlı proqramlarda və ixrac nəzarətinə məruz qalan fəaliyyətlərdə iştirakda şübhəli bilinirlər.

ABŞ-nin maliyyə naziri Skot Bessentin bəyanatına görə, sanksiyalar BMT Təhlükəsizlik Şurasının İrana qarşı təsdiq etdiyi sanksiyaların yenidən qüvvəyə minməsinə dəstək məqsədilə tətbiq edilib. O vurğulayıb ki, Vaşinqton İranın ballistik raket və hərbi təyyarə proqramlarını dəstəkləyən İranın silah tədarükü şəbəkələrini hədəfləyir.