ABŞ prezidenti Donald Tramp bəyan edib ki, Amerika administrasiyası tərəfindən bəzi ölkələrin məhsullarına tətbiq olunan gömrük rüsumları gələcəkdə ləğv olunmaya bilər. Qerbxeber.com xəbər verir ki, bu barədə o, NBC News telekanalına verdiyi müsahibədə bildirib.
Jurnalistin “Rüsumlar daimi olacaqmı, yoxsa gələcəkdə ləğv olunacaq?” sualına cavab verən Tramp deyib: “Xeyr, mən bunu etməyəcəm, çünki əgər kimsə inanırsa ki, tariflər ləğv olunacaq, o zaman niyə ABŞ-da istehsal qurmalıdır?”
Tramp Çinlə ticarət sahəsində çox sərt davrandığını, lakin hazırda Pekinin Vaşinqtonla razılaşma əldə etməyə çalışdığını vurğulayıb: “Bu o deməkdir ki, biz artıq onlarla ticarət etmədiyimiz üçün trilyon dollar itirmirik. Onlar razılaşma əldə etmək istəyirlər. Həqiqətən də, çox istəyirlər. Görək bu necə nəticələnəcək, lakin bu razılaşma ədalətli olmalıdır”.
ABŞ prezidenti bildirib ki, gömrük rüsumlarından amerikalı sahibkarlar üçün istisnalar etməyəcək: “Onların buna ehtiyacı yoxdur”.
Qeyd edək ki, Tramp bu il 2 aprel tarixində 185 ölkə və əraziyə məxsus məhsullara gömrük rüsumlarının tətbiq olunduğunu elan edib. Rusiya bu siyahıya daxil deyil. 10%-lik universal tariflər 5 apreldən, fərdi tariflər isə 9 apreldən qüvvəyə minib. Daha sonra Tramp bəzi ölkə və ərazilərə qarşı qarşılıqlılıq prinsipinə əsaslanan əlavə idxal rüsumlarının tətbiqini 90 gün müddətinə dayandırdığını açıqlayıb. Ağ Ev bu fasilənin ticarət danışıqları ilə bağlı olduğunu, bu müddət ərzində 10%-lik universal tarifin qüvvədə qalacağını bildirib.
Eyni zamanda, Tramp administrasiyası Çindən idxal olunan məhsullara tətbiq edilən tarifləri 125%-ə qaldırıb. Bundan əvvəl isə Kanada, Çin və Meksikanın ABŞ-a fentanil qaçaqmalçılığına qarşı kifayət qədər mübarizə aparmadıqları iddiası ilə 20%-lik əlavə tarif tətbiq olunmuşdu. Hazırda Çin məhsullarına ABŞ tərəfindən tətbiq edilən ümumi tariflər 145%-ə çatır. Çin isə cavab olaraq 12 apreldən etibarən ABŞ məhsullarına tarifləri 125%-ə qədər artırıb.
