Azərbaycan-Gürcüstan-Türkiyə parlamentlərinin Xarici Əlaqələr Komitələrinin növbəti üçtərəfli forumu Bakıda və Şuşa şəhərində keçiriləcək.
24News.ge xəbər verir ki, bu barədə Azərbaycan Respublikası Milli Məclisinin sədri Sahibə Qafarova, Gürcüstan parlamentinin sədri Şalva Papuaşvili ilə keçirdiyi mətbuat konfransında bildirib.
Onun sözlərinə görə, Papuaşvili ilə birgə qanunvericilik fəaliyyəti sahəsində təcrübə mübadiləsi məsələləri də müzakirə olunub: “Parlamentlərarası əlaqələr ölkələr arasında dostluqda körpü rolunu oynayır. Bu gün biz qanunvericilik fəaliyyəti sahəsində təcrübə mübadiləsi məsələlərini də müzakirə etdik.
Azərbaycan-Gürcüstan-Türkiyə parlamentlərinin Xarici Əlaqələr Komitələrinin üçtərəfli formatının işinin əhəmiyyətindən və zəruriliyindən danışdıq. Növbəti üçtərəfli forum Azərbaycanın paytaxtı Bakıda və Şuşa şəhərində keçiriləcək”.
Qafarova həmçinin, Azərbaycanın işğaldan azad olunmuş ərazilərində apardığı yenidənqurma işləri barəsində də məlumat verdiyini bildirib: “Mən Şalva Papuaşviliyə Ermənistanın 30 il ərzində Azərbaycanın işğal olunmuş ərazilərində törətdiyi cinayətləri, mədəni irsə qarşı törətdiyi vandalizm barədə danışdım. Mən öz imkanlarımızla həyata keçirdiyimiz bərpa proseslərindən, yeni şəhərlər, kəndlər, rayonlar, infrastrukturlar haqqında da məlumat verdim. 30 il ərzində şəhərlər, evlər, kəndlər ermənilər tərəfindən dağıdılıb, mədəni irs abidələri vandalizmə məruz qalıb. Biz bütün bunları yenidən qurmalı və ya bərpa etməliyik. Bu müharibə bölgədəki əsas məsələləri həll etdi və bölgədə sülhü möhkəmləndirdi. Bu gün yalnız sülhdən danışmaq lazımdır. Müharibədən sonra erməni tərəfi 5 bəndlik razılaşmaya razı oldu. Nəhayət, Cenevrədəki görüşdə onlar məsələyə müsbət baxdılar. İnanırıq ki, Ermənistan öz öhdəliklərini vaxt itirmədən yerinə yetirəcək və bu razılaşmaların həyata keçirilməsi regionda sülhün möhkəmlənməsi və möhkəmləndirilməsi üçün əsas olacaq. Əminəm ki, bu səfər və müzakirə olunan məsələlər, aparılan danışıqlar Azərbaycan ilə Gürcüstan arasında münasibətləri daha da möhkəmləndirəcək, dostluğumuzu möhkəmləndirəcək”, – deyə Qafarova bildirib.
Xatırladaq ki, Azərbaycan Respublikası Milli Məclisinin sədri Sahibə Qafarova, bu gün nümayəndə heyəti ilə birgə Gürcüstana səfər edib.
Məlumata əsasən, Tbilisinin Şota Rustaveli beynəlxalq hava limanında qonağı Gürcüstan parlamenti sədrinin müavini, Azərbaycan parlamenti ilə dostluq qrupunun rəhbəri Arçil Talakvadze qarşılayıb.
Milli Məclisinin sədri Sahibə Qafarovanın rəsmi səfəri bu gün başlayıb və sabah bitəcək.
