Rusiya sülhməramlılarının Həkəri çayı üzərindəki körpüdə Azərbaycan bayrağına qarşı etdiyi hörmətsizlik Azərbaycan ictimaiyyəti, habelə sosial şəbəkələrdə vətəndaşlar tərəfindən geniş şəkildə müzakirə edilir.
Xüsusilə Rusiya xarici işlər nazirliyinin sözçüsü Mariya Zaxarovanın dili ilə Kremlin “Laçın postunu açın” çağırışı, ardında 15 iyunda Laçın postunda rus hərbçilərinin Azərbaycan bayrağına qarşı davranışı cəmiyyətdə ciddi narazılıq yaratdı. Düzdür, Rusiya sülhməramlıları bundan öncə də bir çox neqativ hala yol verib, lakin iki il yarım ərzində bu cür qaba rəftarla gündəmə gəlməmişdi.
Maraqlıdır, nə baş verdi ki, ruslar bayrağımızı yerə atdılar? Moskvadan Laçın dəhlizi ilə bağlı çağırış niyə indi gəldi?
Rəsmi Bakı Kremlin çağırışına və bayrağımıza qarşı edilən hörmətsizliyə necə cavab verəcək?
“Qərb Xəbər” bildirir ki, mövzu ilə bağlı Globalinfo.az-a danışan politoloq Elxan Şahinoğlu deyib ki, rus hərbçilərinin Azərbaycan bayrağının dirəklə bir yerdən qopardılaraq aşırması əslində Kremlin ölkəmizə qarşı növbəti təxribatıdır:
“Rusiya Xarici İşlər Nazirliyinin sözçüsü Mariya Zaxarova 6 iyul açıqlamasında demişdi ki, “Moskva Laçın dəhlizinin blokadaya alınmasından son dərəcə narahatdır. Bu, üçtərəfli razılaşmalara ziddir. Rusiya sülhməramlıları vəziyyətə yerdəki proseslərə uyğun və üçtərəfli bəyanatlar çərçivəsində reaksiya verəcək”.
Elxan Şahinoğlu
Görünür “Verdikləri reaksiya” bayraq dirəyimizin sökülməsi oldu. Zaxarovanın açıqlamasından bir gün sonra bayraq dirəyimizin aşırdılması görüntüsünün yayılması təsadüfi deyil. Mümkündür ki, elə bu istiqamətdə tapşırıq məhz Kremldən gəlib”.
Politoloq hesab edir ki, Rusiya bayraq dirəyimizi sökməklə, dövlət simvolumuza hörmətsizlik etməklə yanaşı Azərbaycanın öz ərazisində qayda-qanun yaratmaq hüququna qarşı da çıxmış oldu:
“Rusiya Azərbaycanın Qarabağın tamamına nəzarəti bərpa etməsinə mane olmağa çalışır. Azərbaycan Xarici İşlər Nazirliyi və Müdafiə Nazirliyi bu təxribata bəyanatla cavab verməli, Rusiyanın ölkəmizdəki səfiri XİN-ə çağrılaraq ona etiraz bildirilməlidir”.
Eynulla Fətullayev
Haqqın.az portalının rəhbəri Eynulla Fətullayev də özünün Feysbuk səhifəsində belə bir post paylaşıb. Jurnalist bunları qeyd edib: “Laçın-Şuşa yolu qapalıdır və Rusiya əsgərlərinin nəzarətindədir”.
Xatırladaq ki, E.Fətullayev hazırda Qarabağda səfərdədir.
