Kremlin sözçüsü Dmitri Peskov PBS televiziyasına müsahibəsində ABŞ Prezidenti Co Baydenin rusiyalı həmkarı Vladimir Putinə qarşı açıqlamalarının şəxsi təhqir olduğunu bildirib.
“Əvvəla, bu, şəxsi təhqirdir. Siyasi liderin, xüsusən də dünyanın ən böyük ölkəsinin – ABŞ-ın siyasi liderinin ritorikasında şəxsi təhqirin yerini təsəvvür etmək isə çətindir. Biz buna görə çox təəssüflənirik”, – deyə Peskov bildirib.
Mətbuat katibi Baydenin Putinin hakimiyyətdə olması ilə bağlı bəyanatını da tamamilə qəbuledilməz adlandırıb. Onun sözlərinə görə, kimin Rusiya Federasiyasının prezidenti olacağına ABŞ prezidenti deyil, seçkilərdə öz sözünü deyən Rusiya xalqı qərar verir.
Xatırladaq ki, Bayden Varşavada çıxışı zamanı Rusiyanın Ukraynadakı hərbi əməliyyatından danışarkən Putin haqqında belə deyib: “Allah xatirinə, bu adam hakimiyyətdə qala bilməz”.
O, həmçinin Rusiya prezidentini “qəssab” adlandırıb.
Kreml bildirib ki, dövlət başçısına ünvanlanan bu cür bəyanatlar Rusiya ilə ABŞ arasında münasibətlərin yaxşılaşdırılması üçün imkanlar pəncərəsini daraldır. Peskov Baydeni “bir çox yanlış fikirlərin qurbanı” adlandırıb və ABŞ liderinin müşavirlərinin yanlış arqumentlərinin belə bəyanatlara səbəb ola biləcəyini vurğulayıb. / RBK
