“2020-ci ilin 10 noyabrında elan olunan üçtərəfli anlaşmanın ilkin mətnində məhz Qazax rayonunun 7, (Bağanis Ayrım, Yuxarı Əskipara, Aşağı Əskipara, Xeyrimli, Qızılhacılı, Barxudarlı, Sofulu – red.) o cümlədən də Naxçıvanın Kərki kəndinin Ermənistan Silahlı Qüvvələri tərəfindən boşaldılması və Azərbaycana təhvil verilməsi bəndi də yer almışdı”.
“Qərb Xəbər” bildirir ki, bu sözləri Yenisabah.az-a açıqlamasında siyasi şərhçi Oqtay Qasımov söyləyib.
Politoloq Prezident İlham Əliyevin fransalı vəzifədaşı Emmanuel Makronla telefon danışığında Ermənistanın Azərbaycanın 8 kəndini işğal altında saxlaması barəsində səsləndirdiyi fikirlərə toxunub.
Analitik təəssüflənib ki, sonradan mətndən həmin cümlə çıxarıldı:
“Amma bütün hallarda həmin kəndlər Azərbaycan əraziləridir və onların işğal tarixi çox uzaq keçmişdə deyil, 1989-1992-ci illlərdə bu kəndlər işğal olunub. O torpaqlar Azərbaycanın beynəlxalq hüquqda tanınmış sərhədləri çərçivəsində olan ərazilərdir. Sadəcə olaraq, ermənilər nədən bu şərtlərə dirənib həmin kəndləri təslim etməyi ləngidirlər?”.
Siyasi şərhçinin zənnincə, həm Qazaxın 7, həm də Naxçıvanın Kərki kəndi olduqca strateji mövqelərdə yerləşən kəndlərdir:
“Kərki kəndi İrəvanı Zəngəzurla birləşdirən, eyni zamanda İrana gedən yolun üzərində yerləşir və respublika əhəmiyyətli yol birbaşa Kərkinin ərazisindən keçir. İkincisi, Qazaxın Bağanıs Ayrım və Aşağı Əskipara kəndləri isə Ermənistanı Gürcüstanla birləşdirən İrəvan-Tiflis avtomobil yolunun üzərində yerləşir. O baxımdan, həmin kəndlərin Azərbaycanın nəzarətinə keçməsi Ermənistanın onsuz da çıxılmaz olan durumunu bir az da çıxılmaz vəziyyətə salır, Ermənistan üçün olduqca ciddi və qeyri-əlverişsiz şərait yaradır. Buna görə də Ermənistan tərəfi mümkün qədər bu məsələləri uzatmağa çalışır və həmin kəndləri qaytarmaq istəmir”.
Müsahibimiz əlavə edib ki, sülh müqaviləsi ilə bağlı proses olduqca ləng gedir:
“Bunun da əsas səbəbi ondan ibarətdir ki, regionda maraqlı olan dövlətlər, xüsusilə də Fransa, İran və Rusiya bu prosesi ləngitməyə çalışırlar və etiraf etmək lazımdır ki, 2022-ci ilin sonunda buna xeyli dərəcədə nail oldular. Yəni ilin sonuna ehtimal olunan sülh müqaviləsinin imzalanması məsələsi baş tutmayacaq.
O kəndlərin geri qaytarılması məsələsinə gəldikdə, əminəm ki, işğal altında olan Azərbaycan kəndləri ölkəmizin suveren sərhədlərinə qayıdacaq. Mən buna əminəm”.
