Ermənistan Azərbaycanla sülh sazişi layihəsi üzərində işi başa çatdıraraq Bakıya göndərib.
Bu barədə Baş nazir Nikol Paşinyan hökumətin iclasında bildirib. O həmçinin qeyd edib ki, sənəd ABŞ, Fransa və Rusiyaya da göndərilib.
Məsələni “Qərb Xəbər“ə şərh edən politoloq Qabil Hüseynli bildirib ki, bundan əvvəl Azərbaycan sülh müqaviləsinin necə imzalanacağını və həllin 5 prinsipini Ermənistana göndərmişdi. İndi də ermənilər sülh müqaviləsini öz tərəflərindən necə gördüklərini işləyib, hazırlayıb Türkiyə vasitəsilə Azərbaycana göndəriblər.
“Mətbuata sızan bəzi məlumatlara görə Ermənistanın hazırladığı sülh sazişi layihəsinin məzmununa Qarabağ məsələsini də daxil etmək istəyir. Qarabağın dağlıq hissəsində yaşayan ermənilərin hüquqlarının müdafiəsi üçün beynəlxalq bir mexanizm yaradılması kimi bir müddəanı oraya əlavə ediblər. Bu da faktiki olaraq Azərbaycana torpaq iddiası kimi də qiymətləndirilə bilər. Yaxud da Azərbaycanın suveren daxili işlərinə beynəlxalq mexanizm adı altında müəyyən dövlətlərin bu prosesə müdaxiləsini nəzərdə tutur. Ona görə də Azərbaycan bunları qəbul etməyəcək”.
“Hal-hazırda göndərilən sülh sazişi layihəsində hansı məqamlara toxunulub, nələri ifadə etdikləri haqqında mətbuata heç bir sızma yoxdur. Qarabağ məsələsi də sadəcə bir ehtimaldır. Sülh müqaviləsinin imzalanması ilə polemikalar Azərbaycan tərəfinin layihəni nəzərdən keçirdikdən və fikirlərini bildirdikdən sonra başlayacaq. Ermənistanın göndərdiyi sülh müqaviləsi layihəsi mətnində Azərbaycanın təklifləri də öz yerini tutacaqsa, bu sonrakı işləri davam etdirmək üçün əsas ola bilər. Məsələnin həlli istiqamətində addımlar atıla bilər” – deyə politoloq qeyd edib.
Rahib İsgəndərli
