ABŞ-nin Merilend ştatının federal hakimi Teodor Çuanq iş adamı İlon Maskın rəhbərlik etdiyi Hökumətin Səmərəliliyinin Artırılması Agentliyinə (DOGE) ABŞ Beynəlxalq İnkişaf Agentliyinin (USAID) ləğvi prosesini davam etdirməyi müvəqqəti olaraq qadağan edib.
Qerbxeber.com TASS-a istinadən xəbər verir ki, bu barədə “The Washington Post” (WP) qəzeti məhkəmə qərarına əsaslanaraq məlumat yayıb.
Bildirilib ki, məhkəmə təhlükəli regionlarda işləyənlər də daxil olmaqla, minlərlə USAID əməkdaşının elektron poçt və sistemlərə girişini bərpa etməyi, həmçinin agentliyin rəhbərliyinin icazəsi olmadan onların şəxsi məlumatlarını açıqlamamağı DOGE-nin öhdəsinə qoyub. Məhkəmə qərara alıb ki, Maskın hərəkətləri hakimiyyətin bölünməsi prinsipini pozur, çünki yalnız ABŞ Konqresi USAID-i ləğv edə bilər.
Qərar State Democracy Defenders Fund-un agentliyin 20-dən çox işçisi adından qaldırdığı iddia əsasında qəbul edilib. İddiaya əsasən, Mask Senat tərəfindən təsdiqlənməsi tələb olunan səlahiyyətləri qanunsuz şəkildə öz üzərinə götürüb.
WP-nin məlumatına görə, fevral ayına qədər USAID-in 4765 işçisinin təxminən 90 %-i inzibati məzuniyyətə göndərilib, Ronald Reyqan binasındakı mənzil-qərargahı isə bağlanıb.
