Qerbxeber.com Aktual.ge-ə istinadən xəbər verir ki, Gürcüstanın üçüncü prezidenti Mixeil Saakaşvili bu fikirləri müalicə aldığı “Vivamed” klinikasından Tbilisi Şəhər Məhkəməsində “Sərhədi qanunsuz keçmək” ittihamı ilə bağlı iclasa onlayn qoşularkən səsləndirib.
Onun sözlərinə görə, əgər indi gürcü xalqı məğlub olsa, ölkə və gələcək olmayacaq.
“Vətən sevgisi çox güclü hissdir. Bu, heç bir sarayla, gəlirlə, səyahətlə və ya dəbdəbə ilə dəyişdirilə bilməz. Mən həyatımı vətən üçün fəda etdim və məhz buna görə 3 ildən çoxdur ki, göy üzünü görməmişəm, günəşin şüasını hiss etməmişəm, təmiz hava udmamışam. Azadlıq uğrunda mübarizə aparan xalqdan dəyərli heç nə yoxdur. Əgər kimləsə paralel aparmaq istəyirsinizsə, bunu 2007-ci ilin 7 noyabrı ilə yox, Rusiya rejimi və ya Aslan Abaşidzenin rejimi ilə aparın. Şevardnadzeni də misal çəkmirəm. Aslan Abaşidze feodal idi.
Bizim bugünkü vəzifəmiz ayıq-sayıq olmaqdır. 20 yanvara qədər onlar hər şeyi öz xeyirlərinə həll etməyə çalışacaqlar. Əgər buna nail olsalar, onda repressiyaların və bədbəxtliyin şahidi olacaqsınız, o zaman diktaturanın əsl simasını görəcəksiniz. Gəlin hər şeyi öz adı ilə çağıraq: dövlət çökmüş vəziyyətdədir, polisə mənim dövrümdə olan etimad indi nifrətlə əvəzlənib. Siz İvanişvilini Saakaşvili ilə müqayisə edirsiniz? Kiməsə bu gün İvanişvili Saakaşvili kimi görünür? Mənim üçün şəxsi rifah və pul heç bir əhəmiyyət kəsb etmir. Biz tələsməli, formamızda olmalıyıq, o cümlədən 20 yanvar üçün. Anlamalıyıq ki, qarşımızda necə böyük bir çağırış var və onlar nəyə qədər gedə bilərlər. Gürcü cəmiyyəti liderdir, nə keçmişin, nə də gələcəyin siyasətçiləri.
Əgər indi məğlub olsaq, ölkəmiz olmayacaq, əgər indi məğlub olsaq, gələcəyimiz olmayacaq, əgər indi məğlub olsaq, həyatımız olmayacaq!
Rusiya xalqı 2012-ci ildə evinə çəkildi və bundan sonra hər cür bədbəxtlik baş verdi. Belarus xalqı evinə çəkildi və eyni faciələr yaşandı. İndi dayanmaq, yavaşımaq, topu yuvarlamaq vaxtı deyil, indi həlledici inqilabi hərəkətlərin zamanıdır. Ümumxalq inqilabı…” , – Mixeil Saakaşvili deyib.
