Azərbaycanın Mədəniyyət Nazirliyinin təqdim etdiyi milli rəqs geyimlərini, səfir Faiq Quliyev Gürcüstanda fəaliyyət göstərən milli rəqs qruplarına təqdim edib.
“Qərb Xəbər” 24News.ge”yə istinadən xəbər verir ki, 40 dəst kişi və qadın milli geyimləri ölkədə fəaliyyət göstərən “Ceyran” və “Sarvan” ansamblları, rəqs dərnəklərinin olduğu “Çay Evi” mərkəzi və “Yeni Düşüncə İnstitutu” təşkilatına təqdim olunub. Təqdimetmə mərasimində çıxış edən səfir Faiq Quliyev bildirib ki, Azərbaycanın Gürcüstandakı səfirliyi bu ölkədə milli-mədəni irsimizin, dəyərlərimizin, mədəniyyətimizin təbliği, inkişafı və bu işdə soydaşlarımızın rolunun artırılması ilə bağlı layihə həyata keçirir. O qeyd edib ki, səfirliyinin həyata keçirdiyi layihə əsasında ilk öncə Azərbaycan və dünya ədəbiyyatına aid 3 minə yaxın kitab icma mərkəzlərinə təqdim edilib, hazırda isə milli, mədəni fəaliyyətlə məşğul olan soydaşlarımıza Azərbaycanın milli geyimləri təqdim olunub.
Səfirin sözlərinə görə, icmanın müraciətində 100 dəst rəqs paltarı xahiş olunub və yerdə qalan dəstlərin növbəti aylarda əldə olunacağı gözlənilir. Səfir həmçinin gələcəkdə azərbaycanlı icmaya bu cür dəstək tədbirlərinin davam etdiriləcəyini vurğulayıb.
Tbilisidə fəaliyyət göstərən “Ceyran” rəqs ansamblının rəhbəri Ceyran Qurbanova, Marneulidəki “Sarvan” rəqs ansamblının rəhbəri Cəmilə Məmmədova (Sarvanqızı), Marneulidəki “Çay Evi”nin layihə rəhbəri Emin Əhmədov, “Yeni Düşüncə İnstitutu”nun rəhbəri Ariz Daşdəmirov və başqaları çıxış edərək göstərilən diqqət və qayğıya görə, Azərbaycan dövlətinə və səfirliyə minnətdarlıq ediblər.
